كتير واحنا صغيرين كنا اول لما بننجح بنشغل اغنيه الناجح برفع ايده ونفرح ونرقص ونغنى مع الاغنيه لان احلى طعم في الدنيا ممكن تدوقه هو النجاح والتفوق
والناجح بيترقى بسرعه من درجه لدرجه ومن نجاح لنجاح وبيعلي وكل نجاح بيدفعه لنجاح تاني
والناجح بيضربله تعظيم سلام في كل حته وفي كل مكان وبيباركله كل الناس حتى اعداؤه بيباركوله وهما متغاظين جدا
انما الفاشل يعيني عليه مسكين
اولا عبدالحليم حافظ مغناش ليه ولا قاله حتى الفاشل ينزل ايده مش يرفعها
ثانيا اى حد بيشوفه بيتريق عليه وبيسمع كلام يسم البدن
ثالثا بيكره نفسه وحياته واللي حواليه بل ممكن يحس بالحقد من الناجحين اللي حواليه
رابعا وهو الاهم بقى ان عمرنا ماسمعنا عن فاشل بيرتقي من منصب لمنصب بل بالعكس بينزل من فشل لفشل وهكذا


عارفين ياجماعه ايه حكمه اليوم اللي ممكن اقولهالكم انهارده؟؟؟

اول خطوات النجاح هي الفشل
نعم الفشل هو اول خطوات النجاح
اسحاق نيوتن كان طالب فاشل جدا وفي احدى المرات تم طرده من الفصل ومشي بعيد عن المدرسه وراح قعد تحت شجره يفكر وراحت واقعه على دماغه تفاحه وفضل يفكر ويفكر ازاى التفاحه دي وقعت على دماغه وايه اللي جذبها كده بسهوله نحيته لحد لما توصل الى سر الجاذبيه الارضيه واصبح عالم ناجح جدا
يعني فعلا الفشل هو اول طريق النجاح
طب ليه انت مكسوف انك ترفع ايدك وتقول انا فاشل؟؟؟
وليه انتي كمان مستخبيه هناك ومش عاوزه تعترفي انكِ فاشله؟؟؟
ياجماعه الفشل عمره ماكان عيب

العيب هو الاستسلام للفشل
ونقول اهو حظنا كده بقى هنعمل ايه
لو كل فاشل وقف مع نفسه وقفه بسيطه جدا وفضل يفكر ربنا اداله ايه من الامكانيات اللي مش عند غيره وفضل يشتغل على امكانياته وقدراته والله هاينجح
والنجاح هياخده من مكان لمكان احسن منه وهكذا
يلا مستنى ايه
ارفع ايدك بسرعه وقول انا فاشل بس من دلوقتي عمرى ماهكون فاشل وهشتغل وهنجح وهابقى احسن من احسن واحد ناجح

هذه دعوه لكل فاشل ان يغير من نفسه بعزيمه حديديه ليصبح من انجح الشخصيات على وجه الكره الارضيه

من افضل ما سمعت عن الفشل
1-الفاشلين ينقسموا لفريقين :فريق ينفذ دون ان يفكر واخر يفكر دون ان ينفذ.
2-ان لم تنجح الخطه (أ) فاعلم ان الحروف الابجديه عددها 28 حرف.