عُمر من وقت للتانى بيحاول يمثل على ماما الصبح إن عنده مغص، علشان يأخذ يوم إجازة من المدرسة، و أول ما يتأكد أن الأوتوبيس فات يقول لـ ماما أنا حاسس أني بقيت أحسن، ممكن ألعب بالبلايستيشن؟ الأسبوع اللى فات عُمر كان محموم بجد ونايم في السرير لا سأل عن بلايستيشن ولا كارتون، يا ترى ماما حتعمل إيه علشان تسليه وترفع من معنوياته علشان يخف بسرعة؟

الفن على مراية الحمام
لو طفلك بيعاني من الكحة واحتقان فى صدره، أوقات حمام البخار يكون مفيد، جربى أن يكون حمام البخار بشكل جديد.. اقفلى باب الحمام وشغلى المياه الساخنة ودعيه يبدع برسومات على مراية الحمام الممتلئة بالبخار. ثم قومي بتدفئته جيداً بعد ذلك.

ارسم ولوِّن
لو طفلك مش قادر يقوم من السرير علشان ينبسط، جبيله الانبساط لغاية عنده، حضرى ألوان وورق رسم وخليه يرسم ويلون كل اللى يحبه، مثلاً ممكن يتخيل لو كان راح المدرسة كان حيبقى بيعمل إيه مع صحابه، أو إزاى متخيل الدواء اللى أخده بيحارب البرد اللى عنده.

أشغال يدوية
لو طفلك بيحب يشتغل بإيده، ممكن تعملى معاه مشروع صندوق للألوان، ببعض الكارتون، الورق الملون، ألوان شمعية، صمغ وبعض الخرز والترتر، ممكن يخرج أحلى إبداع.

ألعاب ذهنية
ممكن تلعبى ألعاب ذهنية مع طفلك لا تحتاج لمجهود بدنى زى سكرابل، السلم والثعبان، لعبة x,o وغيرها.

قصة فى كتاب
ممكن وقت المرض يتيح لطفلك الفرصة للاستمتاع بالقراءة التي يتجنبها في الغالب فى الأيام العادية، اللى بيكون فيها التليفزيون والبلايستيشن هم أهم الأولويات.

مسرح العرائس
ممكن تألفى مع طفلك مسرحية وبشربات قديمة تعملى عرائس، وبصندوق كارتون قديم تعملى المسرح،

ارسم نفسك
على فرخ ورق كبير اجعلى طفلك ينام عليه، وارسمى حدود جسمه عليه بقلم عريض، اعطي لطفلك القلم ليرسم ملامحه، وبذلك سيشعر أنه رسم نفسه.