الاتزان في الحياة

علشان الانسان يعيش حياة سعيدة , لازم يكون متزن في اركان حياته المختلفة , وطالما ان الانسان عايش , يبقي ليه يعيش حزين وتعيس ومرهق , سواء كانت في حياة الانسان مشاكل او لاء , السعادة في الحياة هتتوقف علي فهم الانسان لطبيعة السعادة .
عيش بأحسن طريقة

لازم تفكر كويس ايه اللي انتا عايزه في حياتك , لما تموت عايز الناس تقول عليك ايه , ايه هي البصمة اللي عايز تسيبها في الدنيا , من هنا هتقدر تحدد فعلا انتا عايز ايه , عايز تعيش ازاي , وبدل ما تكون حياتك كلها عبارة عن شكوي وتعب وحزن ويأس , هتبقي حياتك مغامرة جميلة , من فشل لنجاح ومن نجاح لفشل , هيكون معني الفشل بالنسبة لك فعلا مجرد خبرات وتجارب , هيكون الفشل بالنسبة لك كنز معلومات تقدر تعرف من خلاله ازاي تتصرف في حياتك وتاخد القرارات الصحيحة , من دالواقتي لازم تنسي اي فشل واي تجارب سلبية عدت عليك في حياتك , لازم تعرف ان الماضي راح وانتهي , واللي جي هو الامل والمستقبل المشرق , ودا هيتوقف بس علي طبيعة نظرتك للمستقبل .
حقيبة .. لن تحملها معك اثناء السفر

في قصة جميلة من القصص المؤثرة , دكتور ابراهيم الفقي بيتكلم عن قصة شاب سافر لاحد البلاد علشان يدرس , وفيها نزل في فندق صغير , والشاب دا كان عصبي جدا , وبيحكم علي الناس بدون ما يتعرف عليهم ويعيش معاهم , احكامه علي الناس كانت سلبية , وفي مرة من المرات , الشاب تعب وعلي عكس كل احكامه السلبية علي الناس , اكتشف ان الناس حواليه في الموتيل اهتموا بيه , وقدموا له كل سبل الراحة والهدوء , وساعدوه بجد ان يخف من التعب , وهنا الشاب وصل لنقطة التحول في حياته , وبدأ فعلا يعامل الناس حواليه بحب , وفي مرة صاحب الموتيل تعب , وهنا الشاب وقف جمبه وساعده انه يخف , وهنا بنلمس بجد معني ان الانسان يتغير , معني ان الانسان مايستخدمش الاحكام السلبية علي الاشخاص حواليه , ومعني ان الانسان يساعد الاخرين , وفجأة الوقت خلص والشاب انهي دراسته وراجع بلده , الشاب اخد كل الشنط الخاصة بيه .. لكن فضلت اهم حقيبة , وهي حب الناس ليه , وحبه للناس اللي عاش وسطهم
النجاح في كل جوانب الحياة

من اهم العناصر اللي تميز بيها د/ابراهيم الفقي ربنا يرحمه طوال مشواره التدريبي الحافل بالانجازات , انه دايما كان بيهتم بالاتزان في كل جوانب الحياة , مش بس النجاح في ركن معين , يعني مش معني النجاح ان الانسان يكون ناجح في مجال الشغل بس , او في مجال الدراسة بس , لازم الانسان يكون ناجح روحانيا , واجتماعيا , وشخصيا , وفي كل جوانب الحياة , وبإختصار .. النجاح عند دكتور ابراهيم الفقي ربنا يرحمه هو الاتزان في الحياة .