كتير بيكون مصدر حزن , ضيق أو حتى اكتئاب الواحد هو الناس, تصرفات الناس, كلامهم , أو أياً ما كان صادر من غيره تجاهه.
علاقة فاشلة, تسلّط من شخص ف منصب أعلى ف مكان العمل, أو حتى رفض أو عدم تقبّل من شخص أو مجموعة تجاهنا.
لكن اللى عايز أقوله, المشكلة الحقيقية مش ف الناس, المشكلة أصلها طريقة تفكير انت الّلى مصمم عليها بشكل ف النهاية بيأذيك أنت.
اننا سمحنا لشئ معين , أياً ما كان , إنه يعلق معانا أو ف تفكيرنا أو يأذينا بدرجة يمكن حتى مش متناسبة مع الموقف اللى حصل.
وأنا حريص إنى ما أقولش كلام مطلق, أنا كنت ف فترة بنفس طريقة التفكير دى,
لكن لية أوقات بننسى مواقف جميلة جداً حصلت لنا , بننساها تماماً , مع إنها أولى إننا نفتكرها , وبنفضل بس مركزين على المشاكل!

مبدأ حياتى : المؤمن القوي خير وأحب إلى الله من المؤمن الضعيف.
القوة النفسية جانب أساسى من القوة, القوة النفسية إنّى ما أستسلمش لفكرة كفيلة إنها تدمرنى لو غذيتها بالغضب وبعامل الوقت.
أوقات بيكون ليك ألف حق إنك تغضب لنفسك
لكن لية توجه الغضب ف اتجاه سلبى؟
ف اتجاه تدمير نفسك؟
اغضب لكن, وجه غضبك أو أياً ما كان شعورك السلبى ف اتجاه إيجابي , الّلى هو شئ واحد , شغل أكتر على نفسك ,شغل أكتر على إنّك تكون أحسن, ف النهاية قوام الحياة هو شغلك على نفسك, ودة أساس مسؤوليتك أمام الله.
الحياة قوامها حاجتين
فكرة وعمل بيها.
سواء ف الدين أو ف الدنيا
شوف كل مشاكلك إنها تحدى , وإن " لا يكلف الله نفساً إلا وسعها"
" بدلاً من لعن الظلام أوقد شمعة" = اعمل شئ تساعد بيه نفسك , بدل ما تلعن حظك ف الحياة إلّلى لو تعبت شوية هاتغيره, ف النهاية " ليس للإنسان إلّا ما سعى"
و" لقد خلقنا الإنسان فى كبد"
مش معناها إن الحياة كلّها مشاكل, الحياة ف النهاية بتشوفها على حسب طريقة تفكيرك
لمّا قريت تفسير الآية دى ف تفسيرات قديمة , شوفت ليها تفسيرات ف قمة السوداوية.
لكن التفسيرات ف النهاية اجتهادات, ومش شرط إن تفسيرها إنها بمعنى " إن البؤس مفروض علي الإنسان" يكون صحيح,
لية ما يكونش ليها تفسير مختلف, إن الحياة أصلها العمل, والعمل بيتضمن التعب, وإن الحياة بالنسبة للإنسان عمرها ما كانت بمبدأ " كُن فيكون"
عايز حاجة اتعب ليها, أو اعمل ليها.
الحياة برضه جميلة لأن بمجرد ما تجعل العمل والاجتهاد ف العمل عادة, سواء ف الدين أو الدنيا, هايكون النجاح نصيبك ف الدنيا.

غير زاوية نظرتك لمشاكلك , ممكن ف النهاية ما تلاقيش إن فيه أى مشكلة غير ف عادات تفكير خطأ.