حواء ادم

[غالية نوام]

نموذج من محادثات الأزواج


هو : بدي اطلب بيتزا . بدك شي؟"

هي: "لا."

هو :"اوكي."

هي: "و لا قلك .؟"

هو : "ها .. بدك اطلب لك كمان؟"

هي: "مابعرف."

هو : "مابتعرفي إذا بدك شي!!؟"

هي: "لا."

هو : "انت جوعانة؟"

هي: "يعني .."

هو : "شو يعني يعني...!!؟"

هي: "يعني معناها مو متأكدة إذا كنت جوعانة أو لا."

هو: "الواحد لما يكون جوعان بيعرف"

هي: "اي يمكن جوع بعدين"

هو : "معناها اطلبلك بيتزا."

هي: "طيب و اذا ما كنت جوعانه وقتها..؟"

هو : "ما تاكلي."

هي: "بس هيك بيكون تبذير"

هو : "طيب .. بتاكليها بكرة."

هي: "و اذا ما كان إلي نفس آكل بيتزا بكرة؟"

هو : "هي ما بدها نفس .. الواحد بيقدر ياكل البيتزا كل يوم "

هي: " أنا لا .. ما باكل بيتزا إلا لما يكون عندي نفس للبيتزا."

هو : "معناها بطلب لك شي تاني"

هي: "بس انا ما بدي شي تاني"

هو : "يعني بدك بيتزا؟."

هي: "لا."

هو : "يعني ما بدك شي؟."

هي: "نعم"

هو : "جننتيني شو بدك؟"

هي: "اطلب انت لحالك.."

هو : " أخيراً ... ماشي الحال.."

هي: "بس اطلب بيتزا بالتونا"

هو : "بس أنا ما بحب التونا."

هي: "بس أنا بحبها."

هو : "هو أنا بدي اطلب إلي و لا إلك...؟!"

هي: "إلك طبعا."

هو : "طيب و ليش بالتونا...؟"

هي: "يمكن جوع لما يوصل الأكل"

هو : "و شو يعني؟"

هي: "بالله؟ شو يعني فكرك آكل شي ما بيعجبني؟"

هو : "ليش هو انت بدك تاكلي؟"

هي: "ليش لا ؟"

هو : "يا مثبت العقل و الدين ..معقول أنا لازم أطلب بيتزا إلي عشان إنت تاكليها إذا كنت جوعانه؟"

هي: "بالضبط."

هو : "و أنا شو بدي آكل؟"

هي: "ما هو يمكن ما كون جوعانة..."
هو : "........"
هي:"........"
هو : "......."

[julia]

السلام عليكم
كيفك غالية إن شاء الله تكوني منيحة

أنا لو مكانوا كنت بطلب 2 بيتزا من غير سؤال ولو بدي كبها بعدين أحسن من كل هالتعب
وعلى الأغلب ما بتنكب لأنو هي أكيد تحب هو وتقدر تعبه وتحافظ على ماله ............ الخ
شو رايك

تحياتي

[عائشة لزنك]

والله تعبني هو وهي لو منهم أصوم أفضل.
أختي و أستاذتي أم ابراهيم وجوليا .
شكرااا جزيلالالا أصبت بصداع و أنا في فترة نقاهة من نزلة برد حادة.
آه راسي وجعني
وشهية طيبة للجميع مع أني أفضل الفطائر السورية أطيب بكثير.

[غالية نوام]

أهلين والله بجوليا
وينك اشتقنالك...
بتعرفي يمكن معك حق ولو أنو هلق آدم بدّو يشوف حالو علينا...

أهلين بالعزيزة عائشة وتكرم عيونك منبعتلك الفطاير لعندك ...كم عائشة عنّا